༄༅། །སྟོན་པ་ཐུགས་རྗེ་ཅན་གྱི་བཀའ་སྡེ་སྣོད་གསུམ་སོགས་ཕུལ་བྱུང་ལེགས་བཤད་ཀུན་ལ་དོན་གཉེར་ཆེ་བའི་བཀུར་འོས་མཁྱེན་ལྡན་རྒྱ་ཆེའི་མང་ཚོགས་ཡོངས་ཀྱི་སྙན་ལམ་དུ།
གུས་འདུད་བཅས་ཞུ་སྙིང་།
བདག་ཅག་ཡོངས་ཀྱི་མགོན་སྐྱབས་ཟླ་མེད་སྤྱི་ནོར་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་ཡང་དག་པའི་དབུ་ཁྲིད་འོག འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དང། མཚུངས་མེད་ཤར་བྱང་གི་ཆོས་རྗེ་རྣམ་གཉིས་གཙོས། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཆེས་མཐོའི་གཞུང་འཛིན་ལྷན་ཚོགས་ཀྱི་ཕུལ་བྱུང་ལམ་སྟོན་དང་། ཐུགས་སྨོན་རྒྱ་ཆེན་བཅས་གང་ཅིའི་རམ་འདེགས་རིམ་པར་བསྩལ་གནང་བ་སོགས་ཀྱི་བཀའ་དྲིན་ལ་བརྟེན་ནས། རིང་མིན་ཕྱི་ལོ་༢༠༢༡ ཟླ་བ་༡༢ པའི་ཚེས་༤ དང་༥ རེས་གཟའ་སྤེན་པ་དང་ཉི་མ་བཅས་ཉིན་གཉིས་རིང་དབུ་མ་བཞི་བརྒྱ་པའི་དྲ་ཐོག་བགྲོ་གླེང་ཆེན་མོ་གནང་རྒྱུ་ཡིན་པ་ལྟར། འདི་ནས་གོ་སྒྲིག་པས་དྲ་སྣེ་འདི་ https://www.facebook.com/GelukFoundation/live_videos བརྒྱུད་ངོ་དེབ་ཐོག་བགྲོ་གླེང་ཐད་གཏོང་བྱ་རྒྱུ་ཡིན་པས། དོན་གཉེར་ཅན་གྱི་ཤེས་ལྡན་སེར་སྐྱ་མང་ཚོགས་ཡོངས་ཀྱིས་གལ་ཆེའི་གོ་སྐབས་དམ་འཛིན་གྱིས་གསན་གཟིགས་རྒྱ་ཆེར་འབྱུང་བའི་རེ་སྨོན་དང་དགེ་བསྐུལ་བཅས། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ལས་ཁུངས་ནས་ཕྱི་ལོ་༢༠༢༡ ཟླ་༡༡ ཚེས་༣༠ ལ་ཕུལ།།
https://www.facebook.com/GelukFoundation/live_videos